მედლის ავერსზე აბჯარასხმული, შარავანდიანი მეფე ვახტანგ გორგასალია გამოსახული. მეფეს მარჯვენა ხელით, ჯვრის სახედ, სწორტარიანი და სწორპირიანი ხმალი აღუმართავს, რითაც მისი წმინდანობაა ხაზგასმული. მეფეს მარცხენა ხელზე შევარდენი უზის. შევარდენი, ერთის მხრივ, სამეფო ძალაუფლების სიმბოლო და ატრიბუტია, მეორე მხრივ კი, თბილისის დაარსების ისტორიას უკავშირდება: მეფე ვახტანგმა ნადირობისას შევარდენი ხოხობზე მიუშვა. დადევნებულ მონადირეებს ორივე ცხელ წყაროში ჩავარდნილი და ჩაფუფქული დახვდათ. მეფემ ამ ადგილას ქალაქის დაარსება ბრძანა, ცხელი წყაროების არსებობის გამო თბილისი უწოდა და სატახტო ქალაქად გამოაცხადა.
ვახტანგ გორგასალს მოკლემკლავიანი აბჯარი მოსავს, რომლის ზემოდან მოსასხამი აქვს მოცმული. მოსასხამი ყელთან საკინძით (ფიბულით) არის შეკრული. ვახტანგ გორგასლის სამხედრო აღჭურვილობაში განსაკუთრებით აღსანიშნია სეგმენტური მუზარადი, რომელზეც ჭედურობის ტექნიკით შესრულებული მგლის თავია გამოსახული. ამ მუზარადის დანახვაზე მტერი ვახტანგს უბრძოლველად გაურბოდა.
მედლის ავერსის ზედა, წრიულ სარტყელზე დატანილია წარწერა „ვახტანგ გორგასალი“, ხოლო ქვედა წრიულ სარტყელზე – წარწერა „უმჯობესი და აღმატებული ყოველთა მეფეთა ქართლისათა“. წრიული სარტყელის წარწერები ერთმანეთთან დაკავშირებულია ბოლნური ჯვრის სიმბოლიკით, რომელიც ვახტანგ გორგასლის მიერ აგებული ტაძრის, ბოლნისის სიონის ფასადზეა გამოსახული. მედლის ავერსზე ასევე დატანილია წარწერა „V ს.“ (ვახტანგ გორგასლის მეფობის ხანა), „ტ“ (ტვიფრის ლოგო) და „2022“ (მედლის გამოშვების წელი).
მედლის რევერსზე მეფე ვახტანგ გორგასლის სპარსელებთან ბრძოლის კომპოზიციაა გამოსახული. ცხენზე ამხედრებული, ხმალამოღებული მეფე მოწინააღმდეგეთა ჯგუფშია შეჭრილი. დამფრთხალი სპარსელები შიშს მოუცვია: „ვითარცა იხილიან ვახტანგ თქვან: „მირიდეთ თავსა მგლისასა“… „და იქმნა ბრძოლა ფიცხელი და ძლიერი. მოსწყვდეს ურიცხვ სპარსნი“ (ქართლის ცხოვრება).
მედლის რევერსის ზედა წრიულ სარტყელზე დატანილია წარწერა „ႨႷႭ ႩႠႺႨ ႭჃႸႨႸႨ ႥႨႧႠႰႺႠ ႭჃჄႭႰႺႭ„ (იყო კაცი უშიში ვითარცა უხორცო) შესრულებული ასომთავრული ფონტით.
„ისე იცხოვრეთ, რომ ეძიებდეთ სიკვდილს ქრისტესთვის, რათა წარუვალი დიდება მოიპოვოთ“
/ ვახტანგ გორგასალი /
